Elektron resept sistemi üzrə son istifadəçi üçün lisenziya müqaviləsi

Bu lisenziya müqaviləsi Azərbaycan Respublikası Səhiyyə Nazirliyi və SİNAM şirkəti(bundan sonra Sistem təminatçısı) tərəfindən birgə yaradılan Elektron resept sisteminin(bundan sonra eResept) istifadəçiləri ilə münasibətləri tənzimləyən qarşılıqlı razılaşmadır.

1. Ümumi müddəalar
   1. eResept sistemi müqavilədə qeyd edilən geniş imkanlı funksionallıqları istifadəçilərə təqdim edir. Sistem təminatçısı yeni funksionallıqlar əlavə edə və dəyişdirə bilər. Bu barədə hər yeni versiyada məlumat verilir.
   2. İstifadəçi sistemə qoşulmaqla bu müqavilədə yazılan şərtlərlə razı olduğunu bildirir. İstifadəçi istədiyi zaman sistemdən istifadəni dayandırmaqla müqaviləyə xitam verə bilər.
   3. Sistem təminatçısının istənilən zaman lisenziya müqaviləsində dəyişiklik etməyə ixtiyarı var. Lisenziya müqaviləsi ilə tanış olmaq üçün istifadəçiyə imkan daim yaradılmalıdır.
   4. eResept sistemi Azərbaycan Respublikasında tibbi reseptlərin elektron qaydada qeydiyyatı, təmin edilməsi və nəzarəti məqsədilə yaradılmışdır. Sistemin iştirakçıları resept yazmaq hüququ olan həkimlər, resept yazılan pasientlər və resepti təmin edən əczaçı şirkətlərdir. Lisenziya müqaviləsi bütün növ iştirakçılar üçün keçərlidir.
2. Sistemdə qeydiyyat
   1. Sistemdə qeydiyyat prosesi iştirakçılara görə fərqli qaydada həyata keçirilir.
   2. Pasientlər sistemdən istifadə etmək üçün ilk olaraq ASAN Login sistemində qeydiyyatdan keçməlidir. eResept sisteminə daxil olarkən ASAN Login sisteminə yönləndirilir. ASAN Login sisteminə daxil olduqdan sonra avtomatik olaraq eResept sisteminə daxil olunur. Bundan sonra pasient şəxsi məlumatlarına daxil ola bilir.
   3. Resept yazan həkimlər ASAN Logində qeydiyyatdan əlavə Səhiyyə Nazirliyinin Vahid kadr reyestr sistemində qeydiyyatda olmalıdır. Bütün lisenziyalı həkimlər susmaya görə bu sistemdə mövcuddur və artıq sistemin istifadəçisi hesab olunur. Həkim eResept sisteminə daxil olmaq üçün sistemin yönləndirdiyi ASAN Login sisteminə şəxsi hesabı ilə daxil olaraq avtomatik olaraq eResept sisteminə də daxil olmuş olur. Səhiyyə Nazirliyinin vahid kadr reyestr sistemində mövcud olmayan həkimlər sistemə daxil ola bilməz. Bu hallarda  bu barədə dəstək xidmətinə məlumat vermək tələb olunur.
   4. Əczaçı şirkətlərin və apteklərin sistemdən istifadəsi xüsusi müqavilə əsasında baş tutur. Sistem təminatçısı ilə müqavilə bağlandıqdan sonra əczaçı şirkətə xüsusi inzibatçı hesabı yaradılır. Həmin inzibatçı hesabı vasitəsilə reseptim.az portalında apteklərdə çalışan əczaçılar qeydiyyatdan keçirilir. Qeydiyyat prosesindən sonra hər bir əczaçı ASAN Login sistemində də qeydiyyatdan keçərək eResept sisteminə daxil ola bilər. 
   5. Bütün iştirakçılar sistemə daxil olma məlumatlarını məxfi saxlamalı və digər şəxslərə ötürməməlidir. Sistemə  giriş məlumatları fərdi məlumatların ələ keçməsinə zəmin yaradır və bu halda məsuliyyət iştirakçıların üzərinə düşür.
   6. İştirakçılar sistemdə işini bitirdikdən sonra sistemdən çıxış etməlidir,həmçinin sistemin yönləndirdiyi ASAN Login sistemindən də çıxış etmək tövsiyə olunur. 
3. Sistemdən istifadə qaydaları
   1. Həkimlərin istifadə qaydaları
      1. Həkimlər sistemə daxil olduqları giriş parametrlərini digər şəxslərə ötürməməli və yalnız özləri istifadə etməlidir. Sistemə daxil olduqdan sonra yazılan resept həkimin imzası ilə təsdiqlənir və həkim bu reseptə görə məsuliyyət daşıyır. Ümumi istifadə təyinatlı kompüter və ya mobil cihazda sistemə daxil olaraq resept yazdıqdan sonra sistemdən çıxış etmək tövsiyə olunur.
      2. Həkimlər resepti bu sistem vasitəsilə elektron qaydada yazdıqda bu barədə pasienti məlumatlandırmalıdır.
      3. eResept sistemi müəyyən hallarda həkimlərin şəxsi kabinetinə, mobil cihazlarına push və ya sms bildirişlər göndərə bilər.
      4. Həkim şəxsi kabinetindən öz pasientlərinə, onların reseptlərinə istədiyi vaxt baxa bilər.
      5. Yazılaraq təsdiqlənmiş reseptdə heç bir dəyişiklik oluna bilməz. Sonradan hər hansı bir xəta aşkar edilərsə bu zaman yeni resept yazmaq lazımdır.
      6. Resept yazılarkən sistem həkimə pasientin mobil telefon nömrəsini göstərir. Həkim telefon nömrəsini pasientlə dəqiqləşdirməli, əgər hər hansı dəyişiklik varsa yeni nömrəni daxil etməlidir. Elektron resept barədə məlumat bu telefon nömrəsinə SMS və ya push bildiriş vasitəsilə göndəriləcəkdir. 
      7. Pasientin identifikasiyası pasientin FİN nömrəsi vasitəsilə aparılır. Həkim pasientin FİN nömrəsini daxil edərək yeni resepti yarada bilər.
      8. Həkim heç bir halda pasientin fərdi məlumatlarını digər məqsədlər üçün istifadə edə bilməz və pasientin fərdi məlumatlarının qorunmasına məsuliyyət daşıyır.
      9. Elektron reseptdə psixatrop dərmanlar yazılarsa bu zaman reseptin ikinci təsdiqi həkimin çalışdığı müəssisənin səlahiyyətli şəxsi tərəfindən icra olunur. Yalnız ikinci təsdiqdən sonra pasientə və həkimə bu barədə bildiriş göndərilir və resept qüvvəyə minmiş hesab edilir. Səlahiyyətli şəxs reseptə imtina edərsə bu zaman həkim bu barədə bildiriş alır və resepti yenidən, tövsiyə olunan qaydada yaza bilər.
   2. Pasientlərin istifadə qaydaları
      1. Pasientlər bu müqavilənin 2.2. -ci bəndində göstərilən qaydada sistemə daxil olaraq ona yazılmış reseptləri görə bilər. Reseptlər daimi olaraq pasientin şəxsi hesabında saxlanılır və heç bir halda silinmir. 
      2. Pasient həkim qəbulunda elektron reseptin yazılması üçün hazırda işlək vəziyyətə olan mobil nömrəni təqdim etmək məcburiyyətindədir. Pasientin mobil telefonu yoxdursa və ya digər hallarda digər tanışının yaxud ailə üzvlərinin telefon nömrəsini təqdim edə bilər. Pasient istənilən halda eResept sisteminin mobil tətbiqindən və ya reseptim.az portalında olan şəxsi kabinetindən mobil telefon nömrəsini dəyişdirə bilər. 
      3. Həkim resepti yazarkən təqdim edilən mobil telefon nömrəsinə və eResept sisteminin mobil tətbiqinə push və ya SMS bildiriş daxil olur. Bildirişdə elektron reseptin unikal nömrəsi(ERN) göndərilir. Pasient ERN-i məxfi saxlamalı və yalnız aptekdə dərmanları əldə edərkən əczaçıya təqdim etməlidir. ERN-in digər şəxslərə ötürülməsinə görə pasient məsuliyyət daşıyır. 
      4. Dərmanların alınması zamanı pasient ERN-i yaxud mobil tətbiqdə olan ERN-in QR kodunu təqdim edərək dərmanları ala bilər. Əczaçı yalnız həmin ERN vasitəsilə resepti taparaq orada olan dərmanları görə və təmin edə bilər.
      5. Pasient istənilən halda həkimdən elektron reseptin nömrəsini şifahi və ya yazılı şəkildə də tələb edərək əldə edə bilər.
   3. Əczaçının istifadə qaydaları
      1. Əczaçı bu müqavilənin 2.4. -cü bəndində göstərilən qaydada sistemə daxil olaraq sistemdən istifadə edə bilər.
      2. Əczaçılar ona pasient tərəfindən təqdim edilən elektron resept nömrəsini(ERN) sistemə daxil edərək axtarış edə bilər və yaxud pasient tərəfindən təqdim edilən QR kodu scan etməklə resepti taparaq baxa bilər. 
      3. Əczaçı reseptdə olan dərmanlardan bir neçəsini və ya hamısını, eləcə də bir dərmanın müəyyən hissəsini sata bilər. Bu qayda sığorta növlərinə görə dəyişə bilər və bu qaydalar Səhiyyə Nazirliyi tərəfindən tənzimlənir. Satış qaydaları barədə sistem əczaçıya istiqamət verəcəkdir. 
      4. Pasientə yazılmış reseptdə olan dərmanın digər dərmanlarla əvəzləşdirilməsi yalnız o halda ola bilər ki, veriləcək dərman vasitəsinin təsiredici maddəsi və dozası təyin edilmiş dərman vasitəsində olan təsiredici maddə və doza ilə eynilik təşkil etsin. Bunun üçün əczaçı “analoqu axtar” düyməsini sıxaraq analoq dərman vasitələri siyahısına baxa bilər.
      5. Psixatrop dərmanların təqdim edilməsi adi dərmanların təqdim edilməsi qaydasından fərqlənmir. Belə ki, pasientin təqdim etdiyi elektron reseptdə psixatrop dərman varsa bu o deməkdir ki, artıq bu dərman vasitəsi ikinci möhür vasitəsilə təsdiqlənib və təmin oluna bilər.

 

Müqaviləyə xitam verilməsi birtərəfli qaydada aşağıdakı halların birində baş verə bilər:

1. İstifadəçi müqavilənin şərtlərinin bir və ya bir necə dəfə pozarsa.
2. İstifadəçi sistemin imkanlarından qeyri-qanuni istifadə edərsə və ya üçüncü tərəfin istifadəsinə şərait yaradarsa.
3. İstifadəçi digər şəxslərin fərdi hesablarına daxil olmağa, onların fərdi məlumatlarını əldə etməyə cəhd edərsə.
4. İstifadəçi mobil tətbiqi mobil cihazından silərsə.
5. İştirakçılardan hər hansı birinin Səhiyyə Nazirliyinin qaydalarına uyğun olaraq fəaliyyətinə xitam verilərsə.

İstifadəçilərin fərdi məlumatları ilə bağlı aşağıdakı məxfilik siyasəti mövcuddur:

1. İstifadəçilərin fərdi məlumatları ən son texnologiyalara əsaslanaraq sistem tərəfindən qorunur. Sistemin autentifikasiyası dövlət əhəmiyyətli vahid giriş sistemi olan ASAN Login tərəfindən təmin edilir.
2. İstifadəçilərin fərdi məlumatları yalnız özlərinə aiddir və sadəcə öz istəkləri əsasında üçüncü tərəfə ötürə bilərlər.
3. İstifadəçilərin fərdi məlumatları yalnız qanunvericiliyin tələblərinə uyğun olaraq dövlət əhəmiyyətli sistemlər tərəfindən istifadə oluna bilər.
4. İstifadəçilər fərdi məlumatlarını,  sistemə giriş məlumatlarını, onlara aid olan ERN və resept məlumatlarını üçüncü tərəfə ötürməməli, ötürdükdə buna görə məsuliyyət daşımalıdırlar.